"Jaise aap sabne ab tak meri zindagi ke pehle do parts me dekha…
Mera bachpan pyaar aur khushiyon se bhara tha…
Lekin ab waqt dheere-dheere badalne laga tha…
Jab bhi mere abbu ghar aate the…
To sab kuch accha lagne lagta tha…
Ghar me khushi si aa jaati thi…
Jaise hamari chhoti si duniya phir se jee uthti thi…
Meri chhoti buwa bhi hamare saath hi rehti thi…
Shaadi ke baad bhi wo apne mayke me hi thi…
Kyuki unhe waha accha nahi lagta tha…
Ghar me dheere-dheere ek nayi shuruaat hone wali thi…
3 bachchon ki padhai… aur ek chhota bachcha…
Us ghar me jahan ek rupya kharch karne se pehle 1000 baar sochna padta tha…
Aasaan nahi tha…
Tab mere bade bhai ki fees sirf 16 rupya thi…
Lekin us waqt wo bhi bahut badi baat hoti thi…
Main aur mere doosre number ke bhai gaon ke madrase me padhte the…
Jo hamare ghar ke bilkul paas tha…
Waha humein Hindi ke saath-saath Arbi aur Urdu bhi padhai jaati thi…
Hum teeno bhai-behen padhai me kaafi tez the…
Mere doosre number ke bhai Arbi-Urdu me bahut tez the…
Isliye meri ammi ne socha ki unhe aalim banayengi…
Aur bade bhai ko master…
Unke sapne chhote nahi the…
Wo chahti thi ki unke bachche wo bane… jo wo khud nahi ban paayi…
Dheere-dheere waqt beetta gaya…
Bade bhai ne 5vi pass ki…
Aur ammi ne unhe Maulana banne ke liye Mumbai bhej diya…
Wo ghar se door chale gaye…
Aur meri zindagi me bhi dheere-dheere badlav aane laga…
Tab tak main 2–3 class me thi…
Isi beech ek aur bada faisla hua…
Ghar banane ka…
Abbu ne ammi se kaha…
Aur phir shuru hui naye ghar ki taiyari…
Abbu bahar rehte the…
To poori zimmedari meri ammi ne uthayi…
Paise zyada nahi the…
Isliye ek saath sab banana mumkin nahi tha…
Ammi ne faisla kiya ki pehle 2 kamre aur ek daalan banwayenge…
Jahan pehle baans ke tatte the…
Waha ab darwaze lagne wale the…
Chhota bhai abhi school nahi jaata tha…
Ghar ka kaam… bachchon ka dhyaan… aur ghar banwana…
Sab kuch ammi akeli sambhal rahi thi…
Aasaan nahi tha…
Lekin maa apne bachchon ke liye sab kar leti hai…
Dheere-dheere ghar ban kar tayyar ho gaya…
3 darwaze… aur ek lohe ka channel…
Jo kabhi kisi ne socha bhi nahi tha…
Mere dada-dadi ke liye ye ek sapna jaisa tha…
Abbu ki halat bhi ab thodi theek hone lagi thi…
Wo pehle dhabe par kaam karte the…
Phir pyaaz, aalu aur lahsun ka kaam bhi karne lage…
Aur dheere-dheere unhone bade sapne dekhne shuru kiye…
Wo kehte the…
"Ek din main apna khud ka dhaba chalaunga…"
Jahan ek rupya soch kar kharch hota tha…
Wahi aadmi itne bade sapne dekh raha tha…
Aur shayad…
Wahi sapne sach hone wale the…
Ghar ban gaya tha…
Aage pakka… peeche abhi bhi mitti ka ghar tha…
Zindagi perfect nahi hui thi…
Lekin behtar zaroor ho rahi thi…
Ab humein padhne ke liye jagah mil gayi thi…
Aur wo hi hamare liye bahut tha…
Jab main class 3 me gayi…
Tab abbu ne humein Mumbai bula liya…
Ammi… main aur chhota bhai… waha chale gaye…
Doosra bhai gaon me hi raha…
Abbu ne kiraye ka room liya tha…
Hum lagbhag 6 mahine waha rahe…
Abbu chahte the ki hum wahi rahein…
Lekin meri ammi ne mana kar diya…
Unhone kaha…
"Main apne bachchon ki zindagi barbaad nahi hone dungi…"
Wo jaanti thi ki hum kis layak hain…
Waha rehne se zyada zaroori tha… hamara future…
Isi beech… mere doosre number ke bhai me badlav aane laga…
Wo padhai se bhatakne lage…
Paise lekar movie dekhna… school ke time ghoomna…
Jab abbu ko pata chala…
To unhone bhai ko bahut maara…
Lekin wo gussa pyaar se bhara tha…
Wo nahi chahte the ki unka beta unki tarah struggle kare…
Wo chahte the ki wo padh-likh kar kuch bane…
6 mahine baad…
Ammi ki zid ki wajah se hum wapas gaon aa gaye…
Log kehte the…
"Kitni pyari lag rahi ho… Mumbai ja kar…"
Sach me… kahin jaana… duniya dekhna… ek alag hi khushi deta hai…
Dheere-dheere waqt beetta gaya…
Aur ek din…
Abbu ka sapna sach ho gaya…
Unhone apna khud ka dhaba khol liya…
Jahan wo kabhi kaam karte the…
Aaj wahi ke malik ban gaye the…
Log unhe "Sardar" keh kar bulane lage…
Aur sach me…
Abbu ne apni mehnat se apni pehchaan bana li thi…
Phir ghar ko aur bada karne ki baat hui…
Ammi ne 4 kamre aur ek gallery banwane ka faisla kiya…
Ab bhai bhi bade ho gaye the…
Ghar ka hisaab-kitab samajhne lage the…
Sab kuch dheere-dheere sahi ho raha tha…
Lekin…
Zindagi me mushkilein kabhi khatam nahi hoti…
Mere bade bhai 10vi me fail ho gaye…
Abbu bahut gussa hue…
Lekin ammi ne samjhaya…
"Bachche hain… galti ho jaati hai…"
Bhai depression me chale gaye…
5–6 din tak na kisi se baat ki…
Na khana khaya…
Phir ek din abbu ka phone aaya…
Us waqt mobile nahi hote the…
Telephone hota tha…
Jahan call aata… waha jaakar baat karni padti thi…
Ammi ne sab bataya…
Phir abbu ne bhai ko samjhaya…
"Beta… jahan padhna hai padh…
Hum tere saath hain…"
Uske baad bhai dheere-dheere normal hue…
Aur agli baar pass bhi ho gaye…
Tab tak maine bhi 5vi pass kar li thi…
Bhai ne kaha…
"Iska naam acche school me likhwao… ye padhne me tez hai…"
Aur phir…
Mera admission ek acche school me karwa diya gaya…
Wahi se meri zindagi ka ek naya safar shuru hone wala tha…
Lekin mujhe kya pata tha…
Ki ye safar itna aasaan nahi hoga…
Aur meri zindagi me abhi aur bhi bade imtihaan aane baaki hain…"
"Agar meri kahani aapko pasand aa rahi hai to vote zarur karein aur next part ke liye comment karein… "