"Mere chhote bhai ke aane ke baad… meri zindagi jaise aur bhi khubsurat ho gayi thi…
Hum sab saath rehte the… saath khelte the… aur hamesha khush rehte the…
Mujhe to hamesha aisa lagta tha jaise main kisi raja ki rajkumari hoon…
Mere nakhre uthana jaise sabki aadat ban chuki thi…
Pura gaon jaanta tha mujhe…
Shayad main hi thi jiske har nakhre uthaye jaate the…
Lekin kehte hain na…
Khuli aankhon se dekhe gaye sapne hamesha sach nahi hote…
Aur meri zindagi bhi dheere-dheere mujhe ye samjhaane wali thi…
Mere chhote bhai ke aane ke baad main apne khilone tak bhool gayi thi…
Ab meri duniya sirf mere bhaiyon ke aas-paas simat gayi thi…
Unke saath khelna… unke saath hasna… unke saath hi din beetana…
Yehi meri khushi thi…
Lekin in sab khushiyon ke peeche ek aisi sachchai chhupi thi…
Jise main us waqt samajh nahi paati thi…
Meri ammi…
Unhone zindagi me jitni takleef dekhi thi… shayad main uska andaaza bhi nahi laga sakti…
Wo hamesha humein hasta hua chehra dikhaati thi…
Lekin unke dil me kitna dard tha… ye main tab nahi samajh paayi…
Kabhi-kabhi ghar me khane ke liye kuch bhi nahi hota tha…
Aur aise me… meri ammi bina khaye hi so jaati thi…
Lekin humein kabhi bhookha nahi sone deti thi…
Wo kuch na kuch karke humein khila deti thi…
Chahe khud bhooki reh jaye…
Lekin apne bachchon ka pet zaroor bharti thi…
Us waqt main sirf 3 saal ki thi…
Lekin itni samajh zaroor aa gayi thi ki meri ammi kitni takleef me rehti hai…
Mujhe yaad hai…
Jab baarish hoti thi…
To meri ammi ek haath se mujhe sambhalti thi… aur doosre haath se mere chhote bhai ko…
Wo khud bheeg jaati thi…
Lekin humein bachane ki poori koshish karti thi…
Unke chehre par thakaan hoti thi…
Lekin kabhi shikayat nahi hoti thi…
Wo bahut sabr wali thi…
Aur mere abbu…
Wo dil se sach me ek raja the…
Chahe unke paas paisa na ho…
Lekin unka dil bahut bada tha…
Wo din raat mehnat karte the…
Pyaaz, aalu aur lahsun ka kaam karte the…
Dhaba-dhaba jaa kar samaan pahuchate the…
Aur isi se ghar ka kharcha chalate the…
Zindagi aasaan nahi thi…
Lekin phir bhi ek umeed thi…
Ek yakeen tha…
Rab par yakeen…
Meri ammi kehti thi…
"Ek din hamara bhi waqt badlega…"
Aur shayad…
Wahi waqt dheere-dheere aane wala tha…
Lekin us waqt tak…
Zindagi ne unhe aur bhi aazmaana baaki rakha tha…
Mera chhota bhai bhi ghar par hi paida hua tha…
Us ghar me jahan beti aur bahu me zameen-aasmaan ka farq hota tha…
Meri ammi din bhar kaam karti thi…
Ghar ka bhi… aur khet ka bhi…
Dhoop ho ya baarish…
Thakaan ho ya bimari…
Unhone kabhi rukna nahi sikha…
Aur sabse badi baat…
Unhone kabhi shikayat nahi ki…
Unhe bas apne Rab par bharosa tha…
Ki ek din unki kismat zaroor badlegi…
Meri ammi zyada padh likh nahi paayi thi…
Wo sirf naam ke liye padi thi…
Kyuki unki apni zindagi bhi majbooriyon me guzri thi…
Unki 4 behne aur ek bhai tha…
Aur wo sabse badi thi…
Isliye bachpan se hi unhone zimmedari uthana seekh liya tha…
Sach hi kaha gaya hai…
"Badi behen aksar maa jaisi hoti hai…"
Aur meri ammi ne bhi apni zindagi me ye baat sach kar dikhayi thi…
Wo apne maayke me ek bade aur achhe ghar ki ladki thi…
Unke papa, yani mere nana, achhe khaate-peete the…
Lekin jab wo sasuraal aayi…
To yahan ki zindagi utni aasaan nahi thi…
Phir bhi…
Unhone kabhi shikayat nahi ki…
Bas sab kuch chup-chaap seh liya…
Aaj jab main unki kahani yaad karti hoon…
To mere paas shabd hi khatam ho jaate hain…
Aankhon me aansu aa jaate hain…
Aur dil bhar aata hai…
Lekin shayad…
Unki kahani main kabhi aage bataungi…
Ab mere bade bhai door ke school me padhne jaane lage the…
Aur doosre bhai gaon ke school me hi padhte the…
Chhota bhai abhi bahut chhota tha…
Lekin meri ammi ne kabhi bhi hamari padhai me kami nahi aane di…
Wo khud zyada padh nahi paayi thi…
Lekin humein padhana chahti thi…
Roz raat ko…
Laalten jalakar…
Wo mujhe aur mere bhaiyon ko apne paas baithati thi…
Ek haath me chhote bhai ko sambhalti…
Aur doosre haath se humein padhati…
1-2 ghante tak wo humein padhati rehti…
Log unhe dekh kar haste bhi the…
Ke "dekho, ye mastrain bani baithi hai… pata nahi sahi padha rahi hai ya galat…"
Lekin meri ammi bas muskura deti thi…
Aur kehti thi…
"4 baar galat padhenge… to ek baar sahi zaroor padhenge…"
Mere bade bhai bahut samajhdar the…
Chhoti si umar me hi unhone ammi ki takleef samajh li thi…
Wo humein saath bitha kar padhte the…
Ammi ka haath batate the…
Aur isi tarah…
Hamari zindagi dheere-dheere chalti rahi…
Abbu kabhi-kabhi ghar aate the…
10 din… 15 din… ya zyada se zyada ek mahine ke liye…
Phir wapas chale jaate the…
Lekin jab tak wo rehte the…
Ghar me ek alag hi khushi hoti thi…
Aur shayad isi liye kehte hain…
Jab maa-baap dono Rab par yakeen rakhte hain…
To chhota sa ghar bhi jannat ban jaata hai…"
"Agar meri kahani aapko pasand aa rahi hai to vote zarur karein aur next part ke liye comment karein… "