"Waise to kabhi shabdon mein bayaan nahi kiya ja sakta ek pita ke sacrifice ko… lekin sach ye hai ki ek pita apni family ke liye sab kuch de deta hai."
Mere papa sirf 13 saal ke the jab unhone apna ghar chhod diya. Ghar ki haalat theek karne ke liye, sirf 100 rupaye jeb mein lekar woh Mumbai chale gaye. Na wahan koi apna tha, na rehne ki theek jagah, na hi khane ka sahara… lekin unhone har mushkil mein khud ko sambhala.
Unka sapna tha padhai karna, lekin majbooriyon ne unhe kaam karne par majboor kar diya. Woh furniture ka kaam karne lage. Kuch saalon baad unki shaadi ho gayi, aur phir woh Delhi aa gaye.
Apni pehli kamai se unhone ek ghar kharida — lekin us ghar ka loan chukate-chukate woh depression mein chale gaye. Raaton ko neend nahi aati thi. Ussi dauraan unki ungli mein ek chhoti si chot hui, jo dheere-dheere TB jaisi badi bimari ban gayi. Din-raat hospital ke chakkar lagte rahe… bahut mushkil se woh theek hue.
Zindagi ne unhe kabhi aaram ka mauka nahi diya. Thodi hi der baad unke pet mein problem shuru ho gayi. Phir bhi unhone kabhi apne liye nahi socha.
Unhone apni puri zindagi apne mata-pita, bhai-behen ki dekhbhaal mein laga di… lekin badle mein unhe kabhi respect nahi mila. Mere papa hamesha sochte the — "Main 10 rupaye ka bhi kuch khane se pehle bacha loon, mere bhai kha lenge."
Lekin jab unke bhai bade hue, to wohi log batwaare ki baat karne lage. Kai baar papa ne jhagde ko rokne ki koshish ki… woh rote the, samjhate the… lekin koi nahi samjha.
Unhone kabhi kisi se shikayat nahi ki. Woh bhagwan ke bahut bade bhakt hain. Hamesha kehte hain, "Jo bhi ho raha hai, bhagwan ne soch samajh kar hi kiya hoga."
Aaj 45 saal ki umar mein bhi, unhone khud se English padhna seekh liya — ye koi aam baat nahi hai.
Aur aaj bhi unka ek sapna hai…
Apni khud ki company kholne ka.
Kyuki talent unmein aaj bhi utna hi hai — bas mauke ki der hai.